ភ្នំពេញ៖ អធិការរងខណ្ឌឬស្សីកែវ លោក ចន្ថា វ៉ាន់ឌី បានបាញ់សម្លាប់ខ្លួនកាលពីវេលាម៉ោងប្រមាណ១ និង៣០នាទី ថ្ងៃច័ន្ទ ទី៤ ខែកក្កដានេះ នៅក្នុងផ្ទះក្នុងឃុំកោះឧកញ៉ាតី ស្រុកខ្សាច់កណ្ដាល ខណៈមូលហេតុត្រូវបានអះអាងផ្សេងគ្នា។

អធិការខណ្ឌឬស្សីកែវ វរសេនីយ៍ឯក ហ៊ាង ថារ៉េតបានប្រាប់ EAC News ថាលោកស្ទើរមិនជឿថាលោក ចន្ថា វ៉ាន់ឌី សម្រេចចិត្តជ្រើសយកការសម្លាប់ខ្លួន ដោយថាលោកអធិការរងរូបនេះជាមនុស្សចូលចិត្តសប្បាយមិនមានសូវមានទុក្ខច្រើនទេ។ លោកថានៅថ្ងៃនេះលោក ចន្ថា វ៉ាន់ឌី ទៅធ្វើការធម្មតាតែបន្ទាប់ពីចេញពីធ្វើការសម្រាកថ្ងៃត្រង់ក៏មានរឿងនេះកើតឡើងតែម្ដង។

វរសេនីយ៍ឯក ហ៊ាង ថារ៉េត បានបន្ថែមមូលហេតុនៃការអះអាងផ្សេងៗគ្នានៅឡើយដោយមានការលើកឡើងថាគាត់សម្លាប់ខ្លួនដោយសារជំងឺមហារីករ៉ាំរ៉ៃ ខណៈក្នុងលិខិតមុនអត្តឃាតលោក ចន្ថា វ៉ាន់ឌី ថាមកពីលេងល្បែង។ ទោះជាយ៉ាងណាលោកសមត្ថកិច្ចកំពុងស្រាវជ្រាវបន្តផងដែរ៕